O Hederlezi sito baro dive thay bari festa vash o manusha kola hraminena akava dive.

Akaya festa sitoy paganyuni festa, koya adikergyola sarenendar, ini e yaverendar: turkyendar, albanyendar, serbyendar thay e yaverendar kola siton amare anglipeske niveleste.  Te mothavgyol ini o paganizmesko nav (latinyuno nav “paganus” – gavuno). O paganizmo sine periodo kana sine o pakyavipe pe but devle, pe phuvyako del, panyesko, balalako thay yaver devle. Panjto mayea kana si e rat e Hederlezeski o gavune gavendar avna vrdenca thay traktoryenca e sah familiaha, o juvla, foshne, qhaya, qhave, mursha, phure – phurya. Avna ani turba khardi Karabash ano Prizren, ani turba ovla “nerzi”, sar mangipe vash o sastipe thay shukaripe, shukaripe kotar o bukya thay theripe – manginesko.

Numay e shovto mayea e festa e Herdelezeski festingyola e romendar, kergyola yekh ruqko thay qhingyona sine bakre.

Akale diveste, o foshne thay o terne qhave thay qhaya, uravnape e may laqe thay neve idyenca. Akava dive gengyola sar o sheruno dive o bershesko, sar o nevo bershesko dive, odoleske akale diveste saren manglape te oven loshale thay kamle, vash sah o bersh te ovel loshalo thay kamlo. Ayeka pakyavisalo thay ayeka, pandar akale divende, pakyavgyolape.