Ano mashkar e 59-to generaciako e Kosovaka Republikake Policiako, si 88 kadetya kola si kotar o haricune komunitetya.

Yekh olendar si o Shaban Kurti, kotar ashkalyuno komuniteti kova ka kerel buti e themeske thay amalipaske.

Ov mothavgya kay sah vakti sinele mangipe te servisinel e themeske thay thaneske, kote sine kotor e civilyune malipesko kote implementingya yaverune proyektia ano than.

Leindoy pe dikhipe kay ani akaya generacia si bayrilo o gendo e haricune komunitetesko ani Kosovaki Policia, ov vakerla kayo procesi e skoluipesko, treningosko thay gatisaripyengo ani Policiaki Akademia sine pahre vash oleske, numay e azutipea e Sikavnengo thay Traynerengo sine may lokhe.

Sheruno faktori kay qhinvgya ole te ovel polici si e familia.

Kurti sinele yekh mesazhi vash o sah terne e haricune komuniteteske kola silen mangipe kay te oven kotor e Kosovake Policiako.

“Kharava e sah ternen e haricune komunitetyengo te oven kotor ani Kosovaki Policia odoleske kay profesia e policeski, kobar si phari si ini unikuni profesia. Amen manglape te ova barikane sakova dive kote servisina thay garava amare dizunen”, vakergya ov.

Oleske planya palo Diplomipe si kay te servisinel e themeske, komuniteteske thay malipeske e dinyitetea.

*Akava artiklo realizimo kotar o mediumi “Front Online“, thay ano rami e proyektesko e online gazetako Reporteri.net “Maripe e dezinfromaciako thay propagandako prekal Medialuno Edukipe vash o haricune komunitetya ani Kosova”, financimo prekal o granti e Amerikake Ambasadako ani Prishtina. Autori akale artiklosko si yekh kotar o (6) terne e haricune komunitetyengo ani Kosova kola gatisargyona sar avutne profesionalune zurnalistya, prekal bukyuni praktika ano medialune partneria ano proyekti. Gojalipya, hramipya thay konkluzie numay rekomandipya kola mothavgyona akate si e Autoryenge thay na mangipea vay resipea mothavela o pratsav e Themeske Departamentesko.