Kryetari i Kuvendit, Glauk Konjufca, gjatë homazheve që ka bërë të enjten në fshatin Ribar i Vogël të Lipjanit, si dhe në fshatrat Makoc dhe Sharban të Prishtinës, ka thënë se pa zbardhjen e krimeve të forcave serbe gjatë luftës dhe vënien e autorëve para drejtësisë, as të rënët për liri nuk mund të prehen të qetë.

“Duke ndarë dhimbjen me familjarët e të rënëve kryetari Konjufca theksoi se pa zbardhjen e këtyre krimeve dhe vënien e autorëve të tyre para drejtësisë, as të rënët për liri nuk mund të prehen të qetë në varret e tyre”, thuhet në njoftimin e lëshuar nga Kuvendi.

Në Ribar, para 25 vjetëve forcat serbe vranë 25 civilë shqiptarë. Ndërsa në kompleksin e varrezave në fshatin Makoc të kryeqytetit, prehen eshtrat e 93 shqiptarëve, të cilët ishin në mesin e qindra të vrarëve dhe të masakruarve në rajonin e Gollakut.