Ministri i Punëve të Brendshme, Xhelal Sveçla, ka njoftuar për një zhvillim të rëndësishëm në komunën e Mitrovicës së Veriut, pas nënshkrimit të një marrëveshjeje të re me kryetarin e kësaj komune, Erden Atiq.

Kontrata e re, sipas Sveçlës, i hap rrugë shfrytëzimit të kompleksit të ish-objekteve të Remontit në Mitrovicën e Veriut, duke e kthyer atë në një hapësirë të dobishme për qytetarët.

Në këtë kontekst, ministri shprehu kënaqësinë e tij për faktin se një nga objektet e këtij kompleksi do të ketë një destinim të veçantë.

Ai, së bashku me ministren e Drejtësisë, Albulena Haxhiu, dhe nënkryetaren e Mitrovicës së Veriut, Katarina Adancic, vendosën që kjo ndërtesë të shërbejë si një qendër për përkujdesjen dhe strehimin e viktimave të dhunës në familje.

Ministri Sveçla theksoi se ky hap është vetëm një nga përpjekjet e vazhdueshme të institucioneve për të shtuar dhe avancuar shërbimet për të gjithë qytetarët, pa dallim.

Ai siguroi se bashkëpunimi ndërmjet institucioneve të ndryshme do të vazhdojë, duke u fokusuar në përmirësimin e cilësisë së jetës për të gjithë./Telegrafi/