Gatishmëria e Qeverisë së Kosovës për hapjen e urës mbi lumin Ibër kanë nxitur reagime të fuqishme të ShBA-së dhe BE-së. Zyrtarë e kësaj të fundit kanë paralajmëruar sanksione të reja, nëse ekzekutivi kosovar ndërmerr veprime të njëanshme në këtë drejtim. Paralajmërimet e BE-së për sanksione të reja ndaj Kosovës e kanë shqetësuar opozitën, ndërsa paralajmërimet e tilla qeveria i ka cilësuar si të padrejta.

Zyrtarët e partive opozitare kanë bërë me dije se nëse Kosovës i vendosen masa të reja sanksionuese fajtore është Qeveria e Kosovës.

Anëtari i Kryesisë së LDK-së, Visar Azemi, ka bërë me dije se Qeveria e Kosovës edhe çështjen e urës po e përdor për vota.

“Në një periudhë kur do të duhej t’i gëzoheshim heqjes së sanksioneve të BE-së, sot morëm paralajmërimin për mundësinë e sanksioneve të reja. Edhe kësaj here si pasojë e kryeneçësisë së Albin Kurtit dhe veprimeve të pamatura dhe të pakoordinuara të qeverisë që ai drejton. Edhe një herë duke e përdorur një çështje për arsye elektorale, për një grusht vota”, ka shkruar ai në profilin e tij në “Facebook”.

Sipas tij, Qeveria e Kosovës duhet t`i dëgjojë aleatët në lidhje me veriun.

“Hapja e Urës së Ibrit është diçka që e duam të gjithë. Ajo nuk është hapur jo si mungesë e dëshirës dhe vullnetit, por si vlerësim i aleatëve ndërkombëtarë e paqeruajtës, që i kishim përkrah në themelimin e ndërtimin e shtetit. Atyre që na dhanë mbështetjen në luftë e në paqe. Çdo veprim pa bashkëpunim me ta, është veprim përkundër tyre, e rrjedhimisht kundër shtetit. Çdo lider i secilit institucion do duhej ta kishte të qartë se veprimet në kundërshtim me miqtë tanë, nuk shkojnë në favor të Kosovës. Për më keq, i bëjnë shërbim Serbisë. Konfrontimi me NATO-n, ShBA-në e BE-në çon në udhë pa krye. Ai nuk do të duhej të ndodhte në asnjë mënyrë e asnjëherë”, ka shkruar Azemi.

Edhe deputetja e PDK-së, Ariana Musliu Shoshi, është shprehur e shqetësuar me paralajmërimet e BE-së për sanksione të reja ndaj Kosovës.

Ajo ka vlerësuar se qëllimi i Kurtit është mbajtja e Kosovës nën masa.

“Kurti nuk e vlerëson prosperimin e Kosovës në asnjë fushë të zhvillimit të brendshëm apo të jashtëm! Me rëndësi e ka që të zhvillojë popullizëm me tema të ndjeshme që nuk na dërgojnë askund. Ura e Ibrit është në Kosovë dhe në Kosovë mbetet! E, që Kosova të jetë në masa dhe e dënuar, e izoluar, ky duket se është edhe qëllimi i Kurtit”, ka deklaruar Musliu-Shoshi.

Ndryshe nga opozita, përfaqësuesit e pozitës kanë bërë me dije se masat e reja ndaj Kosovës nuk janë zgjidhje.

Zëdhënësi i Qeverisë së Kosovës, Përparim Kryeziu, ka kritikuar BE-në se pse nuk e ka sanksionuar Serbinë pas sulmit në Banjskë.

“Masat nuk janë zgjidhje. Koha e ka dëshmuar që masat e BE-së ndaj Kosovës kanë qenë të padrejta. Ato vazhdojnë të jenë të tilla për aq kohë sa janë në fuqi. Shtimi i tyre vetëm sa do ta thellonte padrejtësinë. Në anën tjetër shtrohet pyetja çfarë masa ndërmorri BE ndaj Serbisë e cila pas sulmit terrorist dhe paramilitar, shpalli Ditë Kombëtare Zie për tre terroristët e vrarë në Banjskë, kreun e të cilëve, Millan Radoiçiq e strehon dhe financon?”, ka thënë Kryeziu për “Express”.

Ndërsa, deputeti i VV-së, Alban Bajrami, ka fajësuar zyrtarët e BE-së për mosdije.

Në një debat në tëvë1, ai ka shkruar se askush në BE nuk e di pse Kosovës i janë vendosur masat.

“Edhe këto që janë, janë të paarsyeshme. Asnjë zyrtar i BE nuk mundet me tregu pse janë. Ne nuk mundemi mi lënë çështjet e brendshme të Kosovës me i lanë në dorë të një kërcënimi për masa të reja”, ka thënë Bajrami.

Paralajmërimet e BE-së

Bashkimi Evropian dje ka paralajmëruar masa të reja ndëshkuese ndaj Kosovës, pas zhvillimeve të fundit në veri të vendit.

Kjo është bërë me dije nga zëdhënësi Peter Stano, në një konferencë për media.

“Masat janë ende në fuqi sepse shtetet anëtare nuk kanë vendosur për të vepruar apo proceduar për raportin e përfaqësusit të Lartë që është dorzuar para disa jave. Kjo nuk është çudi sepse nëse e mbani mend, masat janë vendosur në qershor të vitit të kaluar ndaj administratës në Prishtinë për faktin se shumëçka po ndodhte që çonte në përshkallëzim dhe në vend të hapave që çonin drejt depërshkallëzimit janë ndërmarrë edhe më shumë hapa të njëanshëm që çojnë në përshkallëzim nga ata njerëz”, ka thënë ai.

Sipas tij, masat ndëshkuese ndaj Kosovës mund të shtohet, nëse qeveria vazhdon me veprime të njëanshme.

“Kështu, masat janë ende aty. Ne thamë atëherë – masat janë progresive: ato mund të shtohen, mund të pakësohen, varësisht nga zhvillimi i situatës dhe kjo është diçka që e trajton pjesën e parë të pyetjes suaj: çfarë do të bëjmë ne? Pra, ne kemi masa në fuqi dhe këto masa gjithashtu mund të shtohen, nëse të gjithë aktorët e BE-së pajtohen që ato duhet të shtohen.”, ka thënë zyrtari i BE-së.

Veprimet e fundit të Qeverisë së Kosovës në veri janë kritikuar ashpër nga ShBA-ja dhe BE-ja/Nacionale/